पहिली ते बारावीचा 25 टक्के अभ्यासक्रम कमी

शिक्षण विभागाला आली उशिरा जाग

मुंबई
प्रतिनिधी
राज्यात कोरोनाचा वाढत्या प्रभावामुळे शाळा उशिराने सुरू होणार असून कमी वेळेत अभ्यासक्रम पूर्ण करून परीक्षा घेण्यासाठी शाळांना सोपे जावे म्हणून राज्य शिक्षण विभागाने पहिली ते बारावीच्या अभ्यासक्रमात 25 टक्के कपात केले आहे. अभ्यासक्रम पूर्ण करण्यासाठी शाळांमध्ये गोंधळ उडू नये म्हणून केंद्रीय बोर्डाने याआधीच अभ्यासक्रम कमी करण्याचे निर्णय घेतले मात्र राज्य शिक्षण विभागाला उशिराने जाग आली.
अभ्यासक्रम लवकर पूर्ण करता यावे यासाठी अभ्यासक्रमात कपात करण्याची मागणी महाराष्ट्र राज्य शिक्षण क्रांती संघटनेचे सचिव सुधीर घागस यांनी केली होती.
देशभरात कोरोणाचा प्रादुर्भाव लक्षात घेऊन सीबीएसई आणि इतर केंद्रीय मंडळानेही ही आपला अभ्यासक्रम कमी करण्याचा निर्णय घेतला होता. त्याच पार्श्वभूमीवर शालेय शिक्षण विभागाने हा निर्णय घेतला आहे. कमी करण्यात आलेल्या अभ्यासक्रमाची यादी शालेय शिक्षण विभागाकडून राज्य शैक्षणिक व संशोधन परिषद, पुणे यांच्या वेबसाईटवर प्रसिद्ध केली जाणार आहे. तसेच शाळांना आणि विद्यार्थ्यांनाही त्यासाठीची माहिती उपलब्ध करून देण्यासाठी आवश्यक त्या उपाययोजना शालेय शिक्षण विभागाकडून केल्या जाणार असल्याचे शालेय शिक्षण विभागाकडून काढण्यात आलेल्या एका जीआर मध्ये सांगण्यात आले आहे.
राज्यात 15 जून पासून शालेय शिक्षण विभागाने शैक्षणिक वर्षाला सुरुवात केली असली तरी अद्यापही प्रत्यक्षात शाळा आणि महाविद्यालयांना सुरुवात झाली नाही. सर्व ठिकाणी ऑनलाइन शाळा आणि त्यांचा अभ्यासक्रम सुरू आहे. नुकतेच विभागाने पहिली ते बारावीपर्यंतचे सर्व शिक्षण ऑनलाइन सुरू ठेवण्याचा निर्णय घेतला होता.
कोरोनाचा प्रादुर्भाव वाढतच असल्याने या पार्श्वभूमीवर तूर्तास शाळा सुरू होऊ शकत नाहीत, हे लक्षात आल्याने शालेय शिक्षण विभागाने राज्यातील सर्व माध्यमांच्या इयत्ता पहिली ते बारावी चा अभ्यासक्रम 25 टक्क्यांनी कमी करण्याचा निर्णय जाहीर केला आहे.
मुख्याध्यापक संघटनेचे मुंबई प्रमुख प्रशांत रेडीज यांनी ही ही शालेय शिक्षण विभागाच्या या उशिरा आलेल्या निर्णयावर आपली नाराजी व्यक्त केली आहे. शिक्षण विभागाकडून शिक्षक मुख्याध्यापक संघटना यांचे विचार ऐकूनच घेतले जात नसल्याने हा सर्व त्यांचा गोंधळ उडाला असल्याची टीकाही त्यांनी केली आहे.
--
कोविड १९ च्या पार्श्वभूमीवर शैक्षणिक वर्ष २०२०-२१ साठी कमी केलेला पाठ्यक्रम राज्य शैक्षणिक संशोधन व प्रशिक्षण परिषदेने या   http://www.maa.ac.in/academic-year-syllabus-2020-2021/ संकेतस्थळावर उपलब्ध करून दिला आहे.